din ka libas-e-dard tha wo to pahan chuke

din kā libās-e-dard thā vo to pahan chuke

raat aa.ī jaane kaun sā ġham oḌhnā paḌe

ab jald aa milo ki daraḳhtoñ ke saath saath

kitne janam guzār chukā huuñ khaḌe khaḌe

aksar isī ḳhayāl ne māyūs kar diyā

shāyad tamām umr yuuñ hī kāTnī paḌe

puure hue haiñ phuul se ik jism ke huzūr

armāñ kuchh aise bhī jo laboñ tak na aa sake

lamhoñ ke taar khīñchtā rahtā thā raat din

ik shaḳhs le gayā mirī sadiyāñ sameT ke

jiine kā shauq le aḌe tāroñ se duur duur

mazbūt haath maut kā dariyā meñ pheñk de

ham ko azāb-e-dahr se miltī nahīñ najāt

tum bhī bahisht-e-jism ko vīrāna kar chale

din ka libas-e-dard tha wo to pahan chuke

raat aai jaane kaun sa gham oDhna paDe

ab jald aa milo ki daraKHton ke sath sath

kitne janam guzar chuka hun khaDe khaDe

aksar isi KHayal ne mayus kar diya

shayad tamam umr yun hi kaTni paDe

pure hue hain phul se ek jism ke huzur

arman kuchh aise bhi jo labon tak na aa sake

lamhon ke tar khinchta rahta tha raat din

ek shaKHs le gaya meri sadiyan sameT ke

jine ka shauq le aDe taron se dur dur

mazbut hath maut ka dariya mein phenk de

hum ko azab-e-dahr se milti nahin najat

tum bhi bahisht-e-jism ko virana kar chale