do-chaar bar hum jo kabhi hans-hansa liye

do-chār baar ham jo kabhī hañs-hañsā liye

saare jahāñ ne haath meñ patthar uThā liye

rahte hamāre paas to ye TūTte zarūr

achchhā kiyā jo apne sapne churā liye

chāhā thā ek phuul ne taḌpeñ usī ke paas

ham ne ḳhushī se peḌoñ meñ kāñTe bichhā liye

āñkhoñ meñ aa.e ashk ne āñkhoñ se ye kahā

ab roko yā girāo hameñ ham to aa liye

sukh jaise bādaloñ meñ nahātī huuñ bijliyāñ

dukh jaise bijliyoñ meñ ye bādal nahā liye

jab ho sakī na baat to ham ne yahī kiyā

apnī ġhazal ke sher kahīñ gungunā liye

ab bhī kisī darāz meñ mil jā.eñge tumheñ

vo ḳhat jo tum ko de na sake likh-likhā liye

do-chaar bar hum jo kabhi hans-hansa liye

sare jahan ne hath mein patthar uTha liye

rahte hamare pas to ye TuTte zarur

achchha kiya jo apne sapne chura liye

chaha tha ek phul ne taDpen usi ke pas

hum ne KHushi se peDon mein kanTe bichha liye

aankhon mein aae ashk ne aankhon se ye kaha

ab roko ya girao hamein hum to aa liye

sukh jaise baadalon mein nahati hun bijliyan

dukh jaise bijliyon mein ye baadal naha liye

jab ho saki na baat to hum ne yahi kiya

apni ghazal ke sher kahin gunguna liye

ab bhi kisi daraaz mein mil jaenge tumhein

wo KHat jo tum ko de na sake likh-likha liye