duaon mein asar baqi na aahon mein asar baqi

duāoñ meñ asar baaqī na aahoñ meñ asar baaqī

hai kuchh le de ke gar baaqī to hai ik chashm-e-tar baaqī

ye kaisā hādsa guzrā ye kaisā sāneha biitā

na āñgan hai na chhat baaqī na haiñ dīvār-o-dar baaqī

chaman vāloñ kī bad-zauqī pe kaliyāñ jaan khotī haiñ

na haiñ ahl-e-nazar baaqī na koī dīda-var baaqī

patā kyā pūchhte haiñ aap ham sahrā-navardoñ se

na apnā shahr hai baaqī mohalla hai na ghar baaqī

fazā.eñ chup havā.eñ chup sadā.eñ chup nidā.eñ chup

navā-e-nīm-shab baaqī na hai bāñg-e-sahar baaqī

ḳhudā jaane nizām-e-mai-kada ko kyā huā 'shamsī'

na vo husn-e-atā baaqī na vo lutf-e-nazar baaqī

duaon mein asar baqi na aahon mein asar baqi

hai kuchh le de ke gar baqi to hai ek chashm-e-tar baqi

ye kaisa hadsa guzra ye kaisa saneha bita

na aangan hai na chhat baqi na hain diwar-o-dar baqi

chaman walon ki bad-zauqi pe kaliyan jaan khoti hain

na hain ahl-e-nazar baqi na koi dida-war baqi

pata kya puchhte hain aap hum sahra-nawardon se

na apna shahr hai baqi mohalla hai na ghar baqi

fazaen chup hawaen chup sadaen chup nidaen chup

nawa-e-nim-shab baqi na hai bang-e-sahar baqi

KHuda jaane nizam-e-mai-kada ko kya hua 'shamsi'

na wo husn-e-ata baqi na wo lutf-e-nazar baqi