duniya ke kuchh na kuchh to talabgar se rahe

duniyā ke kuchh na kuchh to talabgār se rahe

ham apnī hī nazar meñ ḳhatā-kār se rahe

ik marhala thā ḳhatm huā dasht-e-ḳhvāb kā

phir umr bhar jahāñ rahe be-zār se rahe

jur.at kisī ne vādī-e-vahshat kī phir na kī

ham ḳhasta-hāl āhanī dīvār se rahe

ik aks hai jo saath nahīñ chhoḌtā kabhī

ham tā-hayāt ā.īna-bardār se rahe

har sub.h apne ghar meñ usī vaqt jāgnā

āzād log bhī to giraftār se rahe

kār-e-azīm kab koī qudrat meñ thā 'suhail'

ham bas ufuq pe sub.h ke āsār se rahe

duniya ke kuchh na kuchh to talabgar se rahe

hum apni hi nazar mein KHata-kar se rahe

ek marhala tha KHatm hua dasht-e-KHwab ka

phir umr bhar jahan rahe be-zar se rahe

jurat kisi ne wadi-e-wahshat ki phir na ki

hum KHasta-haal aahani diwar se rahe

ek aks hai jo sath nahin chhoDta kabhi

hum ta-hayat aaina-bardar se rahe

har subh apne ghar mein usi waqt jagna

aazad log bhi to giraftar se rahe

kar-e-azim kab koi qudrat mein tha 'suhail'

hum bas ufuq pe subh ke aasar se rahe