duniya mein hum jo apni haqiqat ko pa gae

duniyā meñ ham jo apnī haqīqat ko pā ga.e

to zindagī ke raaz samajh meñ sab aa ga.e

ye sochte haiñ sirf yahī sochte haiñ ab

ham tere dar pe laa.e ga.e haiñ ki aa ga.e

kaliyoñ ko khul ke hañsne kā andāz aa gayā

gulshan meñ aa ke tum jo zarā muskurā ga.e

apnā maqām bhī muta.ayyan na kar sake

vo kyā kaheñge dahr meñ kyā aa.e kyā ga.e

zebā thā un ko dāva-e-tāmīr-e-gulsitāñ

jo bijliyoñ meñ rah ke nasheman banā ga.e

ik ham haiñ raah DhūñD rahe haiñ idhar udhar

ik vo haiñ ḳhush-nasīb jo manzil ko pā ga.e

rāh-e-vafā meñ aa.e haiñ vo marhale jahāñ

'mā.il' baḌe-baḌoñ ke qadam Dagmagā ga.e

duniya mein hum jo apni haqiqat ko pa gae

to zindagi ke raaz samajh mein sab aa gae

ye sochte hain sirf yahi sochte hain ab

hum tere dar pe lae gae hain ki aa gae

kaliyon ko khul ke hansne ka andaz aa gaya

gulshan mein aa ke tum jo zara muskura gae

apna maqam bhi mutayyan na kar sake

wo kya kahenge dahr mein kya aae kya gae

zeba tha un ko dawa-e-tamir-e-gulsitan

jo bijliyon mein rah ke nasheman bana gae

ek hum hain rah DhunD rahe hain idhar udhar

ek wo hain KHush-nasib jo manzil ko pa gae

rah-e-wafa mein aae hain wo marhale jahan

'mail' baDe-baDon ke qadam Dagmaga gae