duniya soche shauq se soche aaj aur kal ke bare mein

duniyā soche shauq se soche aaj aur kal ke baare meñ

maiñ kyuuñ apnā chain gañvā.ūñ us pāgal ke baare meñ

sañg-e-marmar kī qabroñ meñ mahv-e-ḳhvāb the ham donoñ

kal shab dekhā ḳhvāb ajab sā tāj-mahal ke baare meñ

āḳhir us kī sūkhī lakḌī ek chitā ke kaam aa.ī

hare-bhare qisse sunte the jis pīpal ke baare meñ

mere shītal man kī jvālā ko to aur bhī bhaḌkāyā

log na jaane kyā kahte haiñ gañgā-jal ke baare meñ

aañsū ban kar TuuT gayā thā jo sapnoñ kī palkoñ se

saat yugoñ se soch rahā huuñ maiñ us pal ke baare meñ

chūmo ghūñghaT khol ke chūmo us dulhan ke hoñToñ ko

ye apnā dastūr hai mai kī har botal ke baare meñ

vo jo kuTiyā Daal rahā hai vīrāne meñ shahr se duur

saarā shahr pareshāñ kyuuñ hai us pāgal ke baare meñ

'prem' bharī mahfil meñ koī daad nahīñ fariyād nahīñ!

chup sī hai vo jān-e-ġhazal bhī merī ġhazal ke baare meñ

duniya soche shauq se soche aaj aur kal ke bare mein

main kyun apna chain ganwaun us pagal ke bare mein

sang-e-marmar ki qabron mein mahw-e-KHwab the hum donon

kal shab dekha KHwab ajab sa taj-mahal ke bare mein

aaKHir us ki sukhi lakDi ek chita ke kaam aai

hare-bhare qisse sunte the jis pipal ke bare mein

mere shital man ki jwala ko to aur bhi bhaDkaya

log na jaane kya kahte hain ganga-jal ke bare mein

aansu ban kar TuT gaya tha jo sapnon ki palkon se

sat yugon se soch raha hun main us pal ke bare mein

chumo ghunghaT khol ke chumo us dulhan ke honTon ko

ye apna dastur hai mai ki har botal ke bare mein

wo jo kuTiya Dal raha hai virane mein shahr se dur

sara shahr pareshan kyun hai us pagal ke bare mein

'prem' bhari mahfil mein koi dad nahin fariyaad nahin!

chup si hai wo jaan-e-ghazal bhi meri ghazal ke bare mein