falak pe chand nahin koi abr-para nahin

falak pe chāñd nahīñ koī abr-pāra nahīñ

ye kaisī raat hai jis meñ koī sitāra nahīñ

ye inkishāf sitāroñ se bhar gayā dāman

kisī ne itnā kahā jab ki vo hamārā nahīñ

zamīñ bhañvar ho jahāñ āsmāñ samundar ho

vahāñ safar kisī sāhil kā isti.āra nahīñ

maiñ muḳhtalif huuñ zamāne se is liye shāyad

kisī ḳhayāl kī gardish mujhe gavāra nahīñ

ḳhizāñ ke mausam-e-ḳhāmosh ne sadā dī hai

jamāl-e-dost ne phir bhī mujhe pukārā nahīñ

jo reza reza nahīñ dil use nahīñ kahte

kaheñ na ā.īna us ko jo pāra-pāra nahīñ

maiñ zaḳhm zaḳhm sahī phir bhī muskurāyā huuñ

'zafar' ba-nām-e-zafar haar ke bhī haarā nahīñ

falak pe chand nahin koi abr-para nahin

ye kaisi raat hai jis mein koi sitara nahin

ye inkishaf sitaron se bhar gaya daman

kisi ne itna kaha jab ki wo hamara nahin

zamin bhanwar ho jahan aasman samundar ho

wahan safar kisi sahil ka istiara nahin

main muKHtalif hun zamane se is liye shayad

kisi KHayal ki gardish mujhe gawara nahin

KHizan ke mausam-e-KHamosh ne sada di hai

jamal-e-dost ne phir bhi mujhe pukara nahin

jo reza reza nahin dil use nahin kahte

kahen na aaina us ko jo para-para nahin

main zaKHm zaKHm sahi phir bhi muskuraya hun

'zafar' ba-nam-e-zafar haar ke bhi haara nahin