fitna-saman hi nahin fitna-e-saman nikle

fitnā-sāmāñ hī nahīñ fitna-e-sāmāñ nikle

aap to ḳhāna-bar-andāz-e-dil-o-jāñ nikle

be-ḳhudī meñ jise ham samjhe haiñ terā dāman

ain mumkin hai ki apnā hī garebāñ nikle

dil pe dhuñdle se nishāñ the jo ġham-e-duniyā ke

vo bhī dar-parda nuqūsh-e-ġham-e-jānāñ nikle

phir vahī ham vahī be-raunaqī-e-dīda-o-dil

husn ke sho.abde ik ḳhvāb-e-gurezāñ nikle

dard-e-mahrūmī-e-jāved bhī ik daulat hai

ahl-e-ġham bhī tire sharminda-e-ehsāñ nikle

jin se ārā.ish-e-īmāñ kī tavaqqo thī 'azīm'

hādisa hai ki vo ġhārat-gar-e-īmāñ nikle

fitna-saman hi nahin fitna-e-saman nikle

aap to KHana-bar-andaz-e-dil-o-jaan nikle

be-KHudi mein jise hum samjhe hain tera daman

ain mumkin hai ki apna hi gareban nikle

dil pe dhundle se nishan the jo gham-e-duniya ke

wo bhi dar-parda nuqush-e-gham-e-jaanan nikle

phir wahi hum wahi be-raunaqi-e-dida-o-dil

husn ke shoabde ek KHwab-e-gurezan nikle

dard-e-mahrumi-e-jawed bhi ek daulat hai

ahl-e-gham bhi tere sharminda-e-ehsan nikle

jin se aaraish-e-iman ki tawaqqo thi 'azim'

hadisa hai ki wo ghaarat-gar-e-iman nikle