gada-e-shahr-e-ainda tahi-kasa milega

gadā-e-shahr-e-ā.inda tahī-kāsa milegā

tajāvuz aur tanhā.ī kī had par kyā milegā

siyāhī phertī jaatī haiñ rāteñ bahr o bar pe

inhī tārīkiyoñ se mujh ko bhī hissa milegā

maiñ apnī pyaas ke hamrāh mashkīza uThā.e

ki in sairāb logoñ meñ koī pyāsā milegā

rivāyat hai ki ābā.ī makānoñ par sitāra

bahut raushan magar namnāk o afsurda milegā

shajar haiñ aur is miTTī se paivasta raheñge

jo ham meñ se nahīñ āsā.ishoñ se jā milegā

ridā-e-reshmī oḌhe hue guzregī mish.al

nashist-e-sañg pe har sub.h gul-dasta milegā

vo ā.īna jise ujlat meñ chhoḌ aa.e the sāthī

na jaane bād-o-ḳhāk-āsār meñ kaisā milegā

use bhī yaad rakhnā bād-bānī sā.atoñ meñ

vo sayyāra kanār-e-sub.h-e-fardā aa milegā

charā-gāhoñ meñ ruk kar āsmānī ghanTiyoñ ko

suno kuchh der ki vo zamzama-pairā milegā

usī kī vādiyoñ meñ tā.irān-e-rizq-jū ko

nasheman aur ujlī niiñd kā dariyā milegā

usī jā-e-namāz o raaz pe ik roz 'sarvat'

achānak dar khulegā aur vo jhoñkā milegā

gada-e-shahr-e-ainda tahi-kasa milega

tajawuz aur tanhai ki had par kya milega

siyahi pherti jati hain raaten bahr o bar pe

inhi tarikiyon se mujh ko bhi hissa milega

main apni pyas ke hamrah mashkiza uThae

ki in sairab logon mein koi pyasa milega

riwayat hai ki aabai makanon par sitara

bahut raushan magar namnak o afsurda milega

shajar hain aur is miTTi se paiwasta rahenge

jo hum mein se nahin aasaishon se ja milega

rida-e-reshmi oDhe hue guzregi mishal

nashist-e-sang pe har subh gul-dasta milega

wo aaina jise ujlat mein chhoD aae the sathi

na jaane baad-o-KHak-asar mein kaisa milega

use bhi yaad rakhna baad-bani saaton mein

wo sayyara kanar-e-subh-e-farda aa milega

chara-gahon mein ruk kar aasmani ghanTiyon ko

suno kuchh der ki wo zamzama-paira milega

usi ki wadiyon mein tairan-e-rizq-ju ko

nasheman aur ujli nind ka dariya milega

usi ja-e-namaz o raaz pe ek roz 'sarwat'

achanak dar khulega aur wo jhonka milega