gham-e-hayat kahani hai qissa-KHwan hun main

ġham-e-hayāt kahānī hai qissa-ḳhvāñ huuñ maiñ

dil-e-sitam-zada hai rāz-dāñ huuñ maiñ

ziyāda is se koī aaj tak batā na sakā

ki ek nukta-e-nā-qābil-e-bayāñ huuñ maiñ

nazar ke sāmne kaundī thī ek bijlī sī

mujhe batāo ḳhudā-rā ki ab kahāñ huuñ maiñ

ḳhizāñ ne luuT liyā gulshan-e-shabāb magar

kisī bahār ke armān meñ javāñ huuñ maiñ

ye kah rahī hai nazar kī ġham-e-āfrīñ jumbish

kisī ke dil kī tabāhī kī dāstāñ huuñ maiñ

ḳhizāñ kahtī thī maiñ shoḳhi-e-bahārāñ huuñ

bahār kahtī hai rañgīni-e-ḳhizāñ huuñ maiñ

shabāb naam hai us jāñ-navāz lamhe kā

jab aadmī ko ye mahsūs ho javāñ huuñ maiñ

jahān-e-dard-o-alam pūjtā hai mujh ko aah

tapish-e-jabīñ hai lahū sajda āstāñ huuñ maiñ

vo din bhī the ki maiñ jān-e-shabāb thā 'aḳhtar'

ab apne ahd-e-javānī kī dāstāñ huuñ maiñ

gham-e-hayat kahani hai qissa-KHwan hun main

dil-e-sitam-zada hai raaz-dan hun main

ziyaada is se koi aaj tak bata na saka

ki ek nukta-e-na-qabil-e-bayan hun main

nazar ke samne kaundi thi ek bijli si

mujhe batao KHuda-ra ki ab kahan hun main

KHizan ne luT liya gulshan-e-shabab magar

kisi bahaar ke arman mein jawan hun main

ye kah rahi hai nazar ki gham-e-afrin jumbish

kisi ke dil ki tabahi ki dastan hun main

KHizan kahti thi main shoKHi-e-bahaaran hun

bahaar kahti hai rangini-e-KHizan hun main

shabab nam hai us jaan-nawaz lamhe ka

jab aadmi ko ye mahsus ho jawan hun main

jahan-e-dard-o-alam pujta hai mujh ko aah

tapish-e-jabin hai lahu sajda aastan hun main

wo din bhi the ki main jaan-e-shabab tha 'aKHtar'

ab apne ahd-e-jawani ki dastan hun main