gham ke baadal dil-e-nashad pe aise chhae

ġham ke bādal dil-e-nāshād pe aise chhā.e

sāya-e-gul meñ bhī hamrāz na hañsne paa.e

yuuñ tasavvur meñ dabe paañv tirī yaad aa.ī

jis tarah shaam kī bāñhoñ meñ sitāre aa.e

vaqt kī dhuup meñ ham sāya-e-hasrat ban kar

do ghaḌī kū-e-tamannā meñ na chalne paa.e

zindagī mauj-e-talātum kī tarah ruk na sakī

yuuñ to har moḌ pe tūfān hazāroñ aa.e

is se manzil kā pata pūchh rahī hai duniyā

jis kā manzil ke tasavvur se bhī jī ghabrā.e

'rāz' ehsās ke āñgan meñ hoñ tanhā tanhā

ghup añdherā hai magar saath haiñ ġham ke saa.e

gham ke baadal dil-e-nashad pe aise chhae

saya-e-gul mein bhi hamraaz na hansne pae

yun tasawwur mein dabe panw teri yaad aai

jis tarah sham ki banhon mein sitare aae

waqt ki dhup mein hum saya-e-hasrat ban kar

do ghaDi ku-e-tamanna mein na chalne pae

zindagi mauj-e-talatum ki tarah ruk na saki

yun to har moD pe tufan hazaron aae

is se manzil ka pata puchh rahi hai duniya

jis ka manzil ke tasawwur se bhi ji ghabrae

'raaz' ehsas ke aangan mein hon tanha tanha

ghup andhera hai magar sath hain gham ke sae