ghamon se khelte rahna koi hansi bhi nahin

ġhamoñ se khelte rahnā koī hañsī bhī nahīñ

na ho ye khel to phir lutf-e-zindagī bhī nahīñ

nahīñ ki dil meñ tamannā mire koī bhī nahīñ

magar ye baat kuchh aisī kī guftanī bhī nahīñ

abhī maiñ kyā uThūñ niyyat abhī bharī bhī nahīñ

sitam ye aur ki mai kī abhī kamī bhī nahīñ

adā.eñ un kī sunātī haiñ mujh ko merī ġhazal

ġhazal bhī vo ki jo maiñ ne abhī kahī bhī nahīñ

huzūr-e-dost mire gū-magū ke aalam ne

kahā bhī un se jo kahnā thā baat kī bhī nahīñ

hamāre un ke ta.alluq kā ab ye aalam hai

ki dostī kā hai kyā zikr dushmanī bhī nahīñ

kahā jo tark-e-mohabbat ko shaiḳh ne khullā

farishta to nahīñ lekin ye aadmī bhī nahīñ

ghamon se khelte rahna koi hansi bhi nahin

na ho ye khel to phir lutf-e-zindagi bhi nahin

nahin ki dil mein tamanna mere koi bhi nahin

magar ye baat kuchh aisi ki guftani bhi nahin

abhi main kya uThun niyyat abhi bhari bhi nahin

sitam ye aur ki mai ki abhi kami bhi nahin

adaen un ki sunati hain mujh ko meri ghazal

ghazal bhi wo ki jo main ne abhi kahi bhi nahin

huzur-e-dost mere gu-magu ke aalam ne

kaha bhi un se jo kahna tha baat ki bhi nahin

hamare un ke talluq ka ab ye aalam hai

ki dosti ka hai kya zikr dushmani bhi nahin

kaha jo tark-e-mohabbat ko shaiKH ne khulla

farishta to nahin lekin ye aadmi bhi nahin