gard uDe ya koi aandhi hi chale

gard uḌe yā koī āñdhī hī chale

ye umas to kisī unvān Tale

añg par zaḳhm liye ḳhaak male

aan baiThe haiñ tire mahal tale

apnā ghar shahr-e-ḳhamoshāñ sā hai

kaun aa.egā yahāñ shaam Dhale

dil-e-parvāna pe kyā guzregī

jab talak dhuup bujhe sham.a jale

ruup kī jot hai kaalā jaadū

ik chhalāvā ki farishtoñ ko chhale

daldaloñ meñ bhī kañval khilte haiñ

naḳhl-e-ummīd bahar-taur bhale

apne hī rain-baseroñ kī taraf

lauT aa.e haiñ sabhī shaam Dhale

mai-kade meñ to nasha baTtā hai

kaun yaañ jāñche bure aur bhale

raushnī dekh ke chuñdhiyā jaa.eñ

jo añdheroñ meñ baḌhe aur pale

ḳhaar to saif banegā gul kī

ye bhale hī kisī gulchīñ ko khale

raat baaqī hai abhī to 'parvez'

baada sar-josh rahe daur chale

gard uDe ya koi aandhi hi chale

ye umas to kisi unwan Tale

ang par zaKHm liye KHak male

aan baiThe hain tere mahal tale

apna ghar shahr-e-KHamoshan sa hai

kaun aaega yahan sham Dhale

dil-e-parwana pe kya guzregi

jab talak dhup bujhe shama jale

rup ki jot hai kala jadu

ek chhalawa ki farishton ko chhale

daldalon mein bhi kanwal khilte hain

naKHl-e-ummid bahar-taur bhale

apne hi rain-baseron ki taraf

lauT aae hain sabhi sham Dhale

mai-kade mein to nasha baTta hai

kaun yan jaanche bure aur bhale

raushni dekh ke chundhiya jaen

jo andheron mein baDhe aur pale

KHar to saif banega gul ki

ye bhale hi kisi gulchin ko khale

raat baqi hai abhi to 'parwez'

baada sar-josh rahe daur chale