gaya to husn na diwar mein na dar mein tha

gayā to husn na dīvār meñ na dar meñ thā

vo ek shaḳhs jo mehmān mere ghar meñ thā

najāt dhuup se miltī to kis tarah miltī

mirā safar to miyāñ dasht-e-be-shajar meñ thā

ġham-e-zamāna kī nāgan ne Das liyā sab ko

vahī bachā jo tirī zulf ke asar meñ thā

khulī jo aañkh to afsūn-e-ḳhvāb TuuT gayā

abhī abhī koī chehra mirī nazar meñ thā

na aa.ī ghar meñ kabhī ik kiran bhī sūraj kī

agarche merā makāñ vādī-e-sahar meñ thā

milā na ghar se nikal kar bhī chain ai 'zāhid'

khulī fazā meñ vahī zahr thā jo ghar meñ thā

gaya to husn na diwar mein na dar mein tha

wo ek shaKHs jo mehman mere ghar mein tha

najat dhup se milti to kis tarah milti

mera safar to miyan dasht-e-be-shajar mein tha

gham-e-zamana ki nagan ne Das liya sab ko

wahi bacha jo teri zulf ke asar mein tha

khuli jo aankh to afsun-e-KHwab TuT gaya

abhi abhi koi chehra meri nazar mein tha

na aai ghar mein kabhi ek kiran bhi suraj ki

agarche mera makan wadi-e-sahar mein tha

mila na ghar se nikal kar bhi chain ai 'zahid'

khuli faza mein wahi zahr tha jo ghar mein tha