go dagh ho gae hain wo chhaale paDe hue

go daaġh ho ga.e haiñ vo chhāle paḌe hue

haiñ ab bhī dil meñ tere havāle paḌe hue

dasht-e-vafā meñ jal ke na rah jaa.eñ apne dil

vo dhuup hai ki rañg haiñ kaale paḌe hue

sho.ale sā rañg kyā hai vo husn-e-karishma-sāz

haiñ kashmakash meñ dekhne vaale paḌe hue

shabnam sazā hai jur.at-e-ifshā-e-rāz kī

goyā zabān-e-gul meñ haiñ chhāle paḌe hue

dekho hameñ ki manzil-e-hosh-o-talab meñ haiñ

lekin lab-e-savāl pe taale paḌe hue

be-his guzar na yuuñ chaman-e-rozgār se

kāñTe yā phuul kuchh to uThā le paḌe hue

jā.eñge shakl-e-nau se sar-e-bazm-e-yār 'hosh'

muñh par bhabūt kaan meñ baale paḌe hue

go dagh ho gae hain wo chhaale paDe hue

hain ab bhi dil mein tere hawale paDe hue

dasht-e-wafa mein jal ke na rah jaen apne dil

wo dhup hai ki rang hain kale paDe hue

shoale sa rang kya hai wo husn-e-karishma-saz

hain kashmakash mein dekhne wale paDe hue

shabnam saza hai jurat-e-ifsha-e-raaz ki

goya zaban-e-gul mein hain chhaale paDe hue

dekho hamein ki manzil-e-hosh-o-talab mein hain

lekin lab-e-sawal pe tale paDe hue

be-his guzar na yun chaman-e-rozgar se

kanTe ya phul kuchh to uTha le paDe hue

jaenge shakl-e-nau se sar-e-bazm-e-yar 'hosh'

munh par bhabut kan mein baale paDe hue