ghubar-e-waqt mein ab kis ko kho rahi hun main

ġhubār-e-vaqt meñ ab kis ko kho rahī huuñ maiñ

ye bārishoñ kā hai mausam ki ro rahī huuñ maiñ

ye chāñd puurā thā be-iḳhtiyār ghaTne lagā

ye kyā maqām hai kam-umr ho rahī huuñ maiñ

is abr-e-bārāñ meñ manzar barasne lagte haiñ

baras rahī hai ghaTā baal dho rahī huuñ maiñ

maiñ gard-bād kā ik sar-phirā bagūlā thī

ḳhalā.eñ oḌh ke rū-posh ho rahī huuñ maiñ

ye shaam vaqt se pahle chhupā na de sūraj

sunahrī dhuup meñ chunarī bhigo rahī huuñ maiñ

udaas os meñ gum-gashta āñsuoñ kī kasak

laraztī kāñptī maalā piro rahī huuñ maiñ

ḳhalā meñ kho ga.iiñ bāteñ hañsī kī āvāzeñ

suḳhan-shikasta huuñ alfāz kho rahī huuñ maiñ

maiñ jī rahī huuñ yā jiine kā vahm hai mujh ko

na-jāne jaag rahī huuñ ki so rahī huuñ maiñ

ye zard shaam jo sūraj gañvā.e baiThī hai

'sahar' sitāra-e-aflāk ho rahī huuñ maiñ

ghubar-e-waqt mein ab kis ko kho rahi hun main

ye barishon ka hai mausam ki ro rahi hun main

ye chand pura tha be-iKHtiyar ghaTne laga

ye kya maqam hai kam-umr ho rahi hun main

is abr-e-baran mein manzar barasne lagte hain

baras rahi hai ghaTa baal dho rahi hun main

main gard-baad ka ek sar-phira bagula thi

KHalaen oDh ke ru-posh ho rahi hun main

ye sham waqt se pahle chhupa na de suraj

sunahri dhup mein chunari bhigo rahi hun main

udas os mein gum-gashta aansuon ki kasak

larazti kanpti mala piro rahi hun main

KHala mein kho gain baaten hansi ki aawazen

suKHan-shikasta hun alfaz kho rahi hun main

main ji rahi hun ya jine ka wahm hai mujh ko

na-jaane jag rahi hun ki so rahi hun main

ye zard sham jo suraj ganwae baiThi hai

'sahar' sitara-e-aflak ho rahi hun main