gum-sum hawa ke peD se lipTa hua hun mein

gum-sum havā ke peḌ se lipTā huā huuñ meñ

katbe pe apne haath se likkhā huā huuñ maiñ

āñkhoñ meñ vasvasoñ kī na.ī niiñd bas ga.ī

so jā.ūñ ek umr se jaagā huā huuñ maiñ

yārab ragoñ meñ ḳhuun kī hiddat nahīñ rahī

yā karb kī salīb pe laTkā huā huuñ maiñ

apnī bulandiyoñ se girūñ bhī to kis tarah

phailī huī fazāoñ meñ bikhrā huā huuñ maiñ

patte gire to aur bhī aaseb ban ga.e

vo shor hai ki ḳhud se bhī sahmā huā huuñ maiñ

shāḳhoñ se TūTne kī sadā duur tak ga.ī

mahsūs ho rahā hai ki TuuTā huā huuñ maiñ

vo aag hai ki saarī jaḌeñ jal ke rah ga.iiñ

vo zahr hai ki phuul se kāñTā huā huuñ maiñ

kaTte hue tane kā bhī nochā gayā libās

gir kar zamīñ pe aur bhī rusvā huā huuñ maiñ

'afzal' maiñ sochtā huuñ ye kyā ho gayā mujhe

miTTī milī to aur bhī chaTḳhā huā huuñ maiñ

gum-sum hawa ke peD se lipTa hua hun mein

katbe pe apne hath se likkha hua hun main

aankhon mein waswason ki nai nind bas gai

so jaun ek umr se jaga hua hun main

yarab ragon mein KHun ki hiddat nahin rahi

ya karb ki salib pe laTka hua hun main

apni bulandiyon se girun bhi to kis tarah

phaili hui fazaon mein bikhra hua hun main

patte gire to aur bhi aaseb ban gae

wo shor hai ki KHud se bhi sahma hua hun main

shaKHon se TuTne ki sada dur tak gai

mahsus ho raha hai ki TuTa hua hun main

wo aag hai ki sari jaDen jal ke rah gain

wo zahr hai ki phul se kanTa hua hun main

kaTte hue tane ka bhi nocha gaya libas

gir kar zamin pe aur bhi ruswa hua hun main

'afzal' main sochta hun ye kya ho gaya mujhe

miTTi mili to aur bhi chaTKHa hua hun main