gundh ke miTTi jo kabhi chaak pe aa jati hai

gundh ke miTTī jo kabhī chaak pe aa jaatī hai

baat be-mehrī-e-aflāk pe aa jaatī hai

āsmānoñ pe uḌo zehn meñ rakkho ki jo chiiz

ḳhaak se uThtī hai vo ḳhaak pe aa jaatī hai

rañg-o-ḳhushbū kā kahīñ koī kare zikr to baat

ghuum phir kar tirī poshāk pe aa jaatī hai

bikhrā bikhrā sā hai andāz-e-takallum un kā

aur tohmat mire idrāk pe aa jaatī hai

naḳhl mahfūz raheñ bād-e-havādis jo chale

ek aafat ḳhas-o-ḳhāshāk pe aa jaatī hai

chhoḌ jaa.e jo koī chāhne vaalā 'fartāsh'

zindagānī rah-e-saffāk pe aa jaatī hai

gundh ke miTTi jo kabhi chaak pe aa jati hai

baat be-mehri-e-aflak pe aa jati hai

aasmanon pe uDo zehn mein rakkho ki jo chiz

KHak se uThti hai wo KHak pe aa jati hai

rang-o-KHushbu ka kahin koi kare zikr to baat

ghum phir kar teri poshak pe aa jati hai

bikhra bikhra sa hai andaz-e-takallum un ka

aur tohmat mere idrak pe aa jati hai

naKHl mahfuz rahen baad-e-hawadis jo chale

ek aafat KHas-o-KHashak pe aa jati hai

chhoD jae jo koi chahne wala 'fartash'

zindagani rah-e-saffak pe aa jati hai