hasil us mah-laqa ki did nahin

hāsil us mah-laqā kī diid nahīñ

iid hai aur ham ko iid nahīñ

chheḌ dekho ki ḳhat to likkhā hai

mere ḳhat kī magar rasīd nahīñ

jānte hoñ umīd-vār mujhe

un se ye bhī mujhe umiid nahīñ

yuuñ taraste haiñ mai ko goyā ham

pīr-e-mai-ḳhāna ke murīd nahīñ

ḳhuun ho jaa.eñ ḳhaak meñ mil jaa.eñ

hazrat-e-dil se kuchh ba.iid nahīñ

aao mere mazār par bhī kabhī

kushta-e-nāz kyā shahīd nahīñ

ham to māyūs haiñ magar 'beḳhud'

dil-e-nā-fahm nā-umīd nahīñ

hasil us mah-laqa ki did nahin

id hai aur hum ko id nahin

chheD dekho ki KHat to likkha hai

mere KHat ki magar rasid nahin

jaante hon umid-war mujhe

un se ye bhi mujhe umid nahin

yun taraste hain mai ko goya hum

pir-e-mai-KHana ke murid nahin

KHun ho jaen KHak mein mil jaen

hazrat-e-dil se kuchh baid nahin

aao mere mazar par bhi kabhi

kushta-e-naz kya shahid nahin

hum to mayus hain magar 'beKHud'

dil-e-na-fahm na-umid nahin