hai ishq to phir asar bhi hoga

hai ishq to phir asar bhī hogā

jitnā hai idhar udhar bhī hogā

maanā ye ki dil hai us kā patthar

patthar meñ nihāñ sharar bhī hogā

hañsne de use lahad pe merī

ik din vahī nauhagar bhī hogā

naala mirā gar koī shajar hai

ik roz ye bārvar bhī hogā

nādāñ na samajh jahān ko ghar

is ghar se kabhī safar bhī hogā

miTTī kā hī ghar na hogā barbād

miTTī tire tan kā ghar bhī hogā

zulfoñ se jo us kī chhā.egī raat

chehre se ayaañ qamar bhī hogā

gaalī se na Dar jo deñ vo bosa

hai nafā jahāñ zarar bhī hogā

rakhtā hai jo paañv rakh samajh kar

is raah meñ nazr sar bhī hogā

us bazm kī aarzū hai bekār

ham suuñ kā vahāñ guzar bhī hogā

'shahbāz' meñ aib hī nahīñ kul

ek aadh koī hunar bhī hogā

hai ishq to phir asar bhi hoga

jitna hai idhar udhar bhi hoga

mana ye ki dil hai us ka patthar

patthar mein nihan sharar bhi hoga

hansne de use lahad pe meri

ek din wahi nauhagar bhi hoga

nala mera gar koi shajar hai

ek roz ye barwar bhi hoga

nadan na samajh jahan ko ghar

is ghar se kabhi safar bhi hoga

miTTi ka hi ghar na hoga barbaad

miTTi tere tan ka ghar bhi hoga

zulfon se jo us ki chhaegi raat

chehre se ayan qamar bhi hoga

gali se na Dar jo den wo bosa

hai nafa jahan zarar bhi hoga

rakhta hai jo panw rakh samajh kar

is rah mein nazr sar bhi hoga

us bazm ki aarzu hai bekar

hum sun ka wahan guzar bhi hoga

'shahbaz' mein aib hi nahin kul

ek aadh koi hunar bhi hoga