haijaan mein talash-e-sukun kar raha hun main

haijān meñ talāsh-e-sukūñ kar rahā huuñ maiñ

yuuñ apne ġham ko aur fuzūñ kar rahā huuñ maiñ

vo sun rahe haiñ aur tabassum hai zer-e-lab

un se bayān hāl-e-zabūñ kar rahā huuñ maiñ

ab is se baḌh ke aur ho vahshat kā kyā subūt

tālīf nusḳha-hā-e-junūñ kar rahā huuñ maiñ

ik dushman-e-vafā se baḌhā.ī hai rasm-o-rāh

ḳhud apnī ārzūoñ kā ḳhuuñ kar rahā huuñ maiñ

ab vādi-e-junūñ meñ qadam rakh chukā hai ishq

tash.hīr-e-dāġh-hā-e-darūñ kar rahā huuñ maiñ

mas.hūr ho rahe haiñ vo sun kar mirā kalām

dam un pe jaise koī fusūñ kar rahā huuñ maiñ

ma.abūd hai vo bas mirā matlūb hī nahīñ

sajda us āstāne pe yuuñ kar rahā huuñ maiñ

shāyad ki āb-e-teġh hī āb-e-hayāt ho

hadd-e-adab se ḳhud ko barūñ kar rahā huuñ maiñ

siina bhī merā haath bhī mere tumheñ ġharaz

zad-kūb apne siina ko kyuuñ kar rahā huuñ maiñ

chupke se sah rahā huuñ sitam tere bevafā

merī ḳhatā to jab ho ki chuuñ kar rahā huuñ maiñ

zo.am-e-ḳhudī meñ jis pe na jaane kā ahd thā

us dar pe 'ḳhār' sar ko nigūñ kar rahā huuñ maiñ

haijaan mein talash-e-sukun kar raha hun main

yun apne gham ko aur fuzun kar raha hun main

wo sun rahe hain aur tabassum hai zer-e-lab

un se bayan haal-e-zabun kar raha hun main

ab is se baDh ke aur ho wahshat ka kya subut

talif nusKHa-ha-e-junun kar raha hun main

ek dushman-e-wafa se baDhai hai rasm-o-rah

KHud apni aarzuon ka KHun kar raha hun main

ab wadi-e-junun mein qadam rakh chuka hai ishq

tashhir-e-dagh-ha-e-darun kar raha hun main

mashur ho rahe hain wo sun kar mera kalam

dam un pe jaise koi fusun kar raha hun main

mabud hai wo bas mera matlub hi nahin

sajda us aastane pe yun kar raha hun main

shayad ki aab-e-tegh hi aab-e-hayat ho

hadd-e-adab se KHud ko barun kar raha hun main

sina bhi mera hath bhi mere tumhein gharaz

zad-kub apne sina ko kyun kar raha hun main

chupke se sah raha hun sitam tere bewafa

meri KHata to jab ho ki chun kar raha hun main

zoam-e-KHudi mein jis pe na jaane ka ahd tha

us dar pe 'KHar' sar ko nigun kar raha hun main