hairan hun do aankhon se kya dekh raha hun

hairān huuñ do āñkhoñ se kyā dekh rahā huuñ

TuuTe hue har dil meñ ḳhudā dekh rahā huuñ

nazroñ meñ tirī rañg nayā dekh rahā huuñ

hāthoñ meñ bhī kuchh rañg-e-hinā dekh rahā huuñ

ruḳh un kā kahīñ aur nazar aur taraf hai

kis samt se aatī hai qazā dekh rahā huuñ

phir laa.ī hai barsāt tirī yaad kā mausam

gulshan meñ nayā phuul khilā dekh rahā huuñ

tū aa.e na aa.e magar aatī hai tirī yaad

yādoñ meñ tujhe ābla-pā dekh rahā huuñ

ye kaisī siyāsat hai mire mulk pe haavī

insān ko insāñ se judā dekh rahā huuñ

kāġhaz pe hue mere vatan ke ka.ī TukḌe

punjab kī bāñhoñ ko kaTā dekh rahā huuñ

taḳhlīq na sambhalī to bane log muhaqqiq

ġhālib kā huā haal ye kyā dekh rahā huuñ

kal tak jo diye mahfil-e-yārāñ meñ the raushan

aaj un ko sitāroñ meñ chhupā dekh rahā huuñ

hairan hun do aankhon se kya dekh raha hun

TuTe hue har dil mein KHuda dekh raha hun

nazron mein teri rang naya dekh raha hun

hathon mein bhi kuchh rang-e-hina dekh raha hun

ruKH un ka kahin aur nazar aur taraf hai

kis samt se aati hai qaza dekh raha hun

phir lai hai barsat teri yaad ka mausam

gulshan mein naya phul khila dekh raha hun

tu aae na aae magar aati hai teri yaad

yaadon mein tujhe aabla-pa dekh raha hun

ye kaisi siyasat hai mere mulk pe hawi

insan ko insan se juda dekh raha hun

kaghaz pe hue mere watan ke kai TukDe

punjab ki banhon ko kaTa dekh raha hun

taKHliq na sambhali to bane log muhaqqiq

ghaalib ka hua haal ye kya dekh raha hun

kal tak jo diye mahfil-e-yaran mein the raushan

aaj un ko sitaron mein chhupa dekh raha hun