hum ishq mein un makkaron ke be-faeda jalte bhunte hain

ham ishq meñ un makkāroñ ke be-fā.eda jalte bhunte haiñ

matlab jo hamārā sun sun kar kahte haiñ ham ūñchā sunte haiñ

ham kuchh na kisī se kahte haiñ ham kuchh na kisī kī sunte haiñ

baiThe hue bazm-e-dilkash meñ bas dil ke TukḌe chunte haiñ

ulfat ke fasāne par donoñ sar apnā apnā dhunte haiñ

ham sunte haiñ vo kahte haiñ ham kahte haiñ vo sunte haiñ

dil sā bhī koī hamdard nahīñ ham sā bhī koī dil-soz nahīñ

ham jalte haiñ to dil jaltā hai dil bhuntā hai to ham bhunte haiñ

taqdīr kī gardish se na rahā mahfūz hamārā dāman bhī

chunte the kabhī ham lāla-o-gul ab kañkar patthar chunte haiñ

aaj ā.eñge kal ā.eñge kal ā.eñge aaj ā.eñge

muddat se yahī vo kahte haiñ muddat se yahī ham sunte haiñ

aa.heñ na kabhī muñh se niklīñ naale na kabhī aa.e lab tak

ho zabt-e-tap-e-ulfat kā burā ham dil hī dil meñ bhunte haiñ

murġhān-e-chaman bhī merī tarah dīvāne haiñ lekin farq ye hai

maiñ dasht meñ tinke chuntā huuñ vo baaġh meñ tinke chunte haiñ

ho bazm-e-tarab yā bazm-e-alam har majme.a meñ har mauqe.a par

ham sham.a ke sho.ale kī sūrat jalte bhī haiñ sar bhī dhunte haiñ

gulzār-e-jahāñ kī nairañgī āzār jinheñ pahuñchātī hai

kāñToñ ko haTā kar dāman meñ vo phuul chaman ke chunte haiñ

āzār-o-sitam ke shikvoñ kā jhagḌā bhī chuke qissa bhī miTe

tum se jo kahe kuchh baat koī kah do use ham kab sunte haiñ

ghabrā ke jo maiñ un ke dar par detā huuñ kabhī āvāz unheñ

to kahte haiñ vo Thahro dam lo aate haiñ ab afshāñ chunte haiñ

ai 'nūh' kahāñ vo josh apnā vo taur apne vo baat apnī

tūfān uThāte the pahle ab hasrat se sar dhunte haiñ

hum ishq mein un makkaron ke be-faeda jalte bhunte hain

matlab jo hamara sun sun kar kahte hain hum uncha sunte hain

hum kuchh na kisi se kahte hain hum kuchh na kisi ki sunte hain

baiThe hue bazm-e-dilkash mein bas dil ke TukDe chunte hain

ulfat ke fasane par donon sar apna apna dhunte hain

hum sunte hain wo kahte hain hum kahte hain wo sunte hain

dil sa bhi koi hamdard nahin hum sa bhi koi dil-soz nahin

hum jalte hain to dil jalta hai dil bhunta hai to hum bhunte hain

taqdir ki gardish se na raha mahfuz hamara daman bhi

chunte the kabhi hum lala-o-gul ab kankar patthar chunte hain

aaj aaenge kal aaenge kal aaenge aaj aaenge

muddat se yahi wo kahte hain muddat se yahi hum sunte hain

aahen na kabhi munh se niklin nale na kabhi aae lab tak

ho zabt-e-tap-e-ulfat ka bura hum dil hi dil mein bhunte hain

murghan-e-chaman bhi meri tarah diwane hain lekin farq ye hai

main dasht mein tinke chunta hun wo bagh mein tinke chunte hain

ho bazm-e-tarab ya bazm-e-alam har majmea mein har mauqea par

hum shama ke shoale ki surat jalte bhi hain sar bhi dhunte hain

gulzar-e-jahan ki nairangi aazar jinhen pahunchati hai

kanTon ko haTa kar daman mein wo phul chaman ke chunte hain

aazar-o-sitam ke shikwon ka jhagDa bhi chuke qissa bhi miTe

tum se jo kahe kuchh baat koi kah do use hum kab sunte hain

ghabra ke jo main un ke dar par deta hun kabhi aawaz unhen

to kahte hain wo Thahro dam lo aate hain ab afshan chunte hain

ai 'nuh' kahan wo josh apna wo taur apne wo baat apni

tufan uThate the pahle ab hasrat se sar dhunte hain