hum ko mahrum-e-karam uski jafa ne rakkha

ham ko mahrūm-e-karam us kī jafā ne rakkhā

ziist se tañg kisī tañg qabā ne rakkhā

sach to ye hai ki duā ne na davā ne rakkhā

ham ko zinda tire dāman kī havā ne rakkhā

husn vaale to bahut aur haiñ duniyā meñ magar

un ko yakta-e-zamāñ un kī adā ne rakkhā

hasrat-e-dīd na sharminda-e-takmīl huī

tere jalvaoñ ne kahāñ hosh Thikāne rakkhā

zulm chup ho ke saheñ aise to majbūr na the

ham ko lāchār magar terī razā ne rakkhā

rāh-e-ulfat meñ bahut aa.e maqām-e-laġhzish

shukr-sad-shukr bharam merā vafā ne rakkhā

bas hamīñ tak raheñ mahdūd jafā.eñ un kī

lutf itnā to ravā ahl-e-jafā ne rakkhā

rāsta rok liyā fart-e-nazākat ne kabhī

paas aa.e to unheñ duur hayā ne rakkhā

kabhī dāmān-o-girebāñ se ulajhte rahe haath

dard-e-dil ne kabhī masrūf duā ne rakkhā

yaad aate rahe be-tarah mo.attar gesū

aaj bechain bahut bād-e-sabā ne rakkhā

'ḳhār' dushman ne to ilzām tarāshe kyā kyā

surḳh-rū mujh ko magar merī vafā ne rakkhā

hum ko mahrum-e-karam us ki jafa ne rakkha

zist se tang kisi tang qaba ne rakkha

sach to ye hai ki dua ne na dawa ne rakkha

hum ko zinda tere daman ki hawa ne rakkha

husn wale to bahut aur hain duniya mein magar

un ko yakta-e-zaman un ki ada ne rakkha

hasrat-e-did na sharminda-e-takmil hui

tere jalwaon ne kahan hosh Thikane rakkha

zulm chup ho ke sahen aise to majbur na the

hum ko lachaar magar teri raza ne rakkha

rah-e-ulfat mein bahut aae maqam-e-laghzish

shukr-sad-shukr bharam mera wafa ne rakkha

bas hamin tak rahen mahdud jafaen un ki

lutf itna to rawa ahl-e-jafa ne rakkha

rasta rok liya fart-e-nazakat ne kabhi

pas aae to unhen dur haya ne rakkha

kabhi daman-o-gireban se ulajhte rahe hath

dard-e-dil ne kabhi masruf dua ne rakkha

yaad aate rahe be-tarah moattar gesu

aaj bechain bahut baad-e-saba ne rakkha

'KHar' dushman ne to ilzam tarashe kya kya

surKH-ru mujh ko magar meri wafa ne rakkha