hum pe jaur-o-sitam ke kya mani

ham pe jaur-o-sitam ke kyā ma.anī

tark-e-rahm-o-karam ke kyā ma.anī

aish-o-ishrat se ġham ke kyā ma.anī

farbahī hai diram ke kyā ma.anī

raat furqat kī kis ko kahte haiñ

roz-e-hijr-e-sanam ke kyā ma.anī

gar nahīñ us kā sāġhar-e-mai-nāb

kahiye phir jām-e-jam ke kyā ma.anī

pūjnā but kā hai ye kyā mazmūn

aur tavāf-e-haram ke kyā ma.anī

kūcha-e-gul-ruḳhāñ ko kahte haiñ

aur bāġh-e-iram ke kyā ma.anī

yūñhī va.ada karo yaqīñ ho jaa.e

kyuuñ qasam luuñ qasam ke kyā ma.anī

mājrā chashm-e-nam kā tū samjhe

lekin abr-o-karam ke kyā ma.anī

bose va.ade se kam nahīñ manzūr

dam na do ham ko dam ke kyā ma.anī

ek do tiin chaar pāñch chhe saat

yūñhī gin leñge kam ke kyā ma.anī

ai 'saḳhī' yaar ne dikhā.ī kamar

shab jo pūchhā adam ke kyā ma.anī

hum pe jaur-o-sitam ke kya mani

tark-e-rahm-o-karam ke kya mani

aish-o-ishrat se gham ke kya mani

farbahi hai diram ke kya mani

raat furqat ki kis ko kahte hain

roz-e-hijr-e-sanam ke kya mani

gar nahin us ka saghar-e-mai-nab

kahiye phir jam-e-jam ke kya mani

pujna but ka hai ye kya mazmun

aur tawaf-e-haram ke kya mani

kucha-e-gul-ruKHan ko kahte hain

aur bagh-e-iram ke kya mani

yunhi wada karo yaqin ho jae

kyun qasam lun qasam ke kya mani

majra chashm-e-nam ka tu samjhe

lekin abr-o-karam ke kya mani

bose wade se kam nahin manzur

dam na do hum ko dam ke kya mani

ek do tin chaar panch chhe sat

yunhi gin lenge kam ke kya mani

ai 'saKHi' yar ne dikhai kamar

shab jo puchha adam ke kya mani