hum sa diwana kahan mil paega is dahr mein

ham sā dīvāna kahāñ mil pā.egā is dahr meñ

ghar kiyā tā'mīr jis ne dīmakoñ ke shahr meñ

ḳhud-kushī karne meñ bhī nākām rah jaate haiñ ham

kaun amrit ghol detā hai hamāre zahr meñ

kis ko hai marne kī fursat sab yahāñ masrūf haiñ

maut tū bekār meñ aa.ī hai aise shahr meñ

TuuTī kashtī kī tarah haiñ vaqt ke sāhil pe ham

kyā zamāna thā bahā karte the apnī lahr meñ

ek vīrānī sī anjum rah ga.ī āñkhoñ meñ ab

ḳhvāb saare bah ga.e haiñ āñsuoñ kī nahr meñ

hum sa diwana kahan mil paega is dahr mein

ghar kiya ta'mir jis ne dimakon ke shahr mein

KHud-kushi karne mein bhi nakaam rah jate hain hum

kaun amrit ghol deta hai hamare zahr mein

kis ko hai marne ki fursat sab yahan masruf hain

maut tu bekar mein aai hai aise shahr mein

TuTi kashti ki tarah hain waqt ke sahil pe hum

kya zamana tha baha karte the apni lahr mein

ek virani si anjum rah gai aankhon mein ab

KHwab sare bah gae hain aansuon ki nahr mein