humse bhaga na karo dur ghazalon ki tarah

ham se bhāgā na karo duur ġhazāloñ kī tarah

ham ne chāhā hai tumheñ chāhne vāloñ kī tarah

ḳhud-ba-ḳhud niind sī āñkhoñ meñ ghulī jaatī hai

mahkī mahkī hai shab-e-ġham tire bāloñ kī tarah

tere bin raat ke hāthoñ pe ye tāroñ ke ayāġh

ḳhūb-sūrat haiñ magar zahr ke pyāloñ kī tarah

aur kyā is se ziyāda koī narmī bartūñ

dil ke zaḳhmoñ ko chhuā hai tire gāloñ kī tarah

gungunāte hue aur aa kabhī un sīnoñ meñ

terī ḳhātir jo mahakte haiñ shivāloñ kī tarah

terī zulfeñ tirī āñkheñ tire abrū tire lab

ab bhī mash.hūr haiñ duniyā meñ misāloñ kī tarah

ham se māyūs na ho ai shab-e-daurāñ ki abhī

dil meñ kuchh dard chamakte haiñ ujāloñ kī tarah

mujh se nazreñ to milāo ki hazāroñ chehre

merī āñkhoñ meñ sulagte haiñ savāloñ kī tarah

aur to mujh ko milā kyā mirī mehnat kā sila

chand sikke haiñ mire haath meñ chhāloñ kī tarah

justujū ne kisī manzil pe Thaharne na diyā

ham bhaTakte rahe āvāra ḳhayāloñ kī tarah

zindagī jis ko tirā pyaar milā vo jaane

ham to nākām rahe chāhne vāloñ kī tarah

hum se bhaga na karo dur ghazalon ki tarah

hum ne chaha hai tumhein chahne walon ki tarah

KHud-ba-KHud nind si aankhon mein ghuli jati hai

mahki mahki hai shab-e-gham tere baalon ki tarah

tere bin raat ke hathon pe ye taron ke ayagh

KHub-surat hain magar zahr ke pyalon ki tarah

aur kya is se ziyaada koi narmi bartun

dil ke zaKHmon ko chhua hai tere galon ki tarah

gungunate hue aur aa kabhi un sinon mein

teri KHatir jo mahakte hain shiwalon ki tarah

teri zulfen teri aankhen tere abru tere lab

ab bhi mashhur hain duniya mein misalon ki tarah

hum se mayus na ho ai shab-e-dauran ki abhi

dil mein kuchh dard chamakte hain ujalon ki tarah

mujh se nazren to milao ki hazaron chehre

meri aankhon mein sulagte hain sawalon ki tarah

aur to mujh ko mila kya meri mehnat ka sila

chand sikke hain mere hath mein chhaalon ki tarah

justuju ne kisi manzil pe Thaharne na diya

hum bhaTakte rahe aawara KHayalon ki tarah

zindagi jis ko tera pyar mila wo jaane

hum to nakaam rahe chahne walon ki tarah