hum tujhse koi baat bhi karne ke nahin the

ham tujh se koī baat bhī karne ke nahīñ the

imkān bhī hālāt sañvarne ke nahīñ the

bhar Daalā unheñ bhī mirī bedār nazar ne

jo zaḳhm kisī taur bhī bharne ke nahīñ the

ai ziist idhar dekh ki ham ne tirī ḳhātir

vo din bhī guzāre jo guzarne ke nahīñ the

kal raat tirī yaad ne tūfāñ vo uThāyā

aañsū the ki palkoñ pe Thaharne ke nahīñ the

un ko bhī utārā hai baḌe shauq se ham ne

jo naqsh abhī dil meñ utarne ke nahīñ the

ai gardish-e-ayyām hameñ rañj bahut hai

kuchh ḳhvāb the aaise ki bikharne ke nahīñ the

hum tujh se koi baat bhi karne ke nahin the

imkan bhi haalat sanwarne ke nahin the

bhar Dala unhen bhi meri bedar nazar ne

jo zaKHm kisi taur bhi bharne ke nahin the

ai zist idhar dekh ki hum ne teri KHatir

wo din bhi guzare jo guzarne ke nahin the

kal raat teri yaad ne tufan wo uThaya

aansu the ki palkon pe Thaharne ke nahin the

un ko bhi utara hai baDe shauq se hum ne

jo naqsh abhi dil mein utarne ke nahin the

ai gardish-e-ayyam hamein ranj bahut hai

kuchh KHwab the aaise ki bikharne ke nahin the