ہم یوں ہی بکھرے نہیں ہر سو خس و خاشاک میں

ہم یوں ہی بکھرے نہیں ہر سو خس و خاشاک میں

ہیں نمو بر دوش رنگ و بو خس و خاشاک میں

اس کے ہونے کا گماں رہتا ہے میرے آس پاس

ہر طرف رچ بس گئی خوشبو خس و خاشاک میں

ہو ثمر آور ہماری آبلہ پائی کہیں

چین آ جائے کسی پہلو خس و خاشاک میں

چاہئے ہوتی ہے کشت زر کو جب بھی کچھ نمو

میں بہا دیتا ہوں کچھ آنسو خس و خاشاک میں

جانتی ہے وہ بصیرت تک کو الجھانے کا فن

جو کشش ہے صورت جادو خس و خاشاک میں

جب ادھر اٹھتے ہیں طالع آزماؤں کے قدم

بجھنے لگتے ہیں ادھر جگنو خس و خاشاک میں

یہ تو اے جاویدؔ گزرے موسموں کی راکھ ہے

آخرش کیا ڈھونڈھتا ہے تو خس و خاشاک میں