hamara nam pukare hamare ghar aae

hamārā naam pukāre hamāre ghar aa.e

ye dil talāsh meñ jis kī hai vo nazar aa.e

na jaane shahr-e-nigārāñ pe kyā guzartī hai

fazā-e-dasht-e-alam koī to ḳhabar aa.e

nishān bhuul ga.ī huuñ maiñ rāh-e-manzil kā

ḳhudā kare ki mujhe yād-e-rahguzar aa.e

maiñ āñdhiyoñ meñ bhī phūloñ ke rañg paḌh lūñgī

tire badan kī mahak lauT kar agar aa.e

ġhubār ġham kā dayār-e-vafā meñ uḌtā hai

magar ye ashk bahut kaam chashm-e-tar aa.e

safar kā rañg hasīñ qurbatoñ kā hāmil ho

bahār ban ke koī ab to ham-safar aa.e

na.ī sahar kā maiñ 'gulnār' isti.āra huuñ

fazā-e-tīra-shabī ḳhatm ho sahar aa.e

hamara nam pukare hamare ghar aae

ye dil talash mein jis ki hai wo nazar aae

na jaane shahr-e-nigaran pe kya guzarti hai

faza-e-dasht-e-alam koi to KHabar aae

nishan bhul gai hun main rah-e-manzil ka

KHuda kare ki mujhe yaad-e-rahguzar aae

main aandhiyon mein bhi phulon ke rang paDh lungi

tere badan ki mahak lauT kar agar aae

ghubar gham ka dayar-e-wafa mein uDta hai

magar ye ashk bahut kaam chashm-e-tar aae

safar ka rang hasin qurbaton ka hamil ho

bahaar ban ke koi ab to ham-safar aae

nai sahar ka main 'gulnar' istiara hun

faza-e-tira-shabi KHatm ho sahar aae