hamare shahr ki KHamoshiyan nirali hain

hamāre shahr kī ḳhāmoshiyāñ nirālī haiñ

sukūn-baḳhsh haiñ chehre magar savālī haiñ

kuchh aise fan se mirī jur.atoñ ko chhīnā hai

shikāyateñ jo mire lab pe haiñ ḳhayālī haiñ

zamāne vaale ajab imtihān lete haiñ

junūn de ke mire zabt ke savālī haiñ

vo chand bāteñ jo ahl-e-suḳhan ke nashtar thiiñ

tumhārī bazm ke māhaul meñ chhupā lī haiñ

maiñ apne sar ko bachāne kahāñ kahāñ jā.ūñ

ye rāheñ saarī hī maqtal ko jaane vaalī haiñ

ham apne zehn pe vo zaḳhm sah chuke 'shāhid'

davā.eñ jin kī zamāne ne ab nikālī haiñ

hamare shahr ki KHamoshiyan nirali hain

sukun-baKHsh hain chehre magar sawali hain

kuchh aise fan se meri juraton ko chhina hai

shikayaten jo mere lab pe hain KHayali hain

zamane wale ajab imtihan lete hain

junun de ke mere zabt ke sawali hain

wo chand baaten jo ahl-e-suKHan ke nashtar thin

tumhaari bazm ke mahaul mein chhupa li hain

main apne sar ko bachane kahan kahan jaun

ye rahen sari hi maqtal ko jaane wali hain

hum apne zehn pe wo zaKHm sah chuke 'shahid'

dawaen jin ki zamane ne ab nikali hain