hansi labon pe sajae udas rahta hai

hañsī laboñ pe sajā.e udaas rahtā hai

ye kaun hai jo mire ghar ke paas rahtā hai

ye aur baat ki miltā nahīñ koī us se

magar vo shaḳhs sarāpā sipās rahtā hai

jahāñ pe Duub gayā merī aas kā sūraj

usī jagah vo sitāra-shanās rahtā hai

guzar rahā huuñ maiñ saudā-garoñ kī bastī se

badan pe dekhiye kab tak libās rahtā hai

likhī hai kis ne ye tahrīr reg-e-sāhil par

bahut dinoñ se samundar udaas rahtā hai

maiñ vahshatoñ ke safar meñ bhī huuñ kahāñ tanhā

yahī gumāñ hai koī ās-pās rahtā hai

maiñ guftugū ke har andāz ko samajhtā huuñ

ki merī zaat meñ lahja-shanās rahtā hai

vo fāsloñ meñ bhī rakhtā hai rañg qurbat ke

nazar se duur sahī dil ke paas rahtā hai

jab un se guftugū kartā hai koī bhī 'ejāz'

ik iltimās pas-e-iltimās rahtā hai

hansi labon pe sajae udas rahta hai

ye kaun hai jo mere ghar ke pas rahta hai

ye aur baat ki milta nahin koi us se

magar wo shaKHs sarapa sipas rahta hai

jahan pe Dub gaya meri aas ka suraj

usi jagah wo sitara-shanas rahta hai

guzar raha hun main sauda-garon ki basti se

badan pe dekhiye kab tak libas rahta hai

likhi hai kis ne ye tahrir reg-e-sahil par

bahut dinon se samundar udas rahta hai

main wahshaton ke safar mein bhi hun kahan tanha

yahi guman hai koi aas-pas rahta hai

main guftugu ke har andaz ko samajhta hun

ki meri zat mein lahja-shanas rahta hai

wo faslon mein bhi rakhta hai rang qurbat ke

nazar se dur sahi dil ke pas rahta hai

jab un se guftugu karta hai koi bhi 'ejaz'

ek iltimas pas-e-iltimas rahta hai