hansi mein saghar-e-zarrin khanak khanak jae

hañsī meñ sāġhar-e-zarrīñ khanak khanak jaa.e

shabāb us kī sadā kā chhalak chhalak jaa.e

dil-o-nazar meñ basī hai vo chāñd sī sūrat

vo dil-kashī hai ki bālak humak humak jaa.e

libās meñ hai vo tarz-e-tapāk-e-ārā.ish

jo añg chāhe chhupānā jhalak jhalak jaa.e

qadam qadam tirī ra.anā.iyoñ ke dar vā hoñ

ravish ravish tirā āñchal Dhalak Dhalak jaa.e

nafas nafas ho sabā kī tarah bahār-añgez

ufuq ufuq gul-e-hastī mahak mahak jaa.e

nashāt-e-qurb ke lamhoñ meñ us kī añgḌā.ī

ubhar ke ḳhāk-e-badan se dhanak dhanak jaa.e

baqā ke raaz haiñ sab us pe munkashif 'akbar'

vo shāḳh-e-sabz havā se lachak lachak jaa.e

hansi mein saghar-e-zarrin khanak khanak jae

shabab us ki sada ka chhalak chhalak jae

dil-o-nazar mein basi hai wo chand si surat

wo dil-kashi hai ki baalak humak humak jae

libas mein hai wo tarz-e-tapak-e-araish

jo ang chahe chhupana jhalak jhalak jae

qadam qadam teri ranaiyon ke dar wa hon

rawish rawish tera aanchal Dhalak Dhalak jae

nafas nafas ho saba ki tarah bahaar-angez

ufuq ufuq gul-e-hasti mahak mahak jae

nashat-e-qurb ke lamhon mein us ki angDai

ubhar ke KHak-e-badan se dhanak dhanak jae

baqa ke raaz hain sab us pe munkashif 'akbar'

wo shaKH-e-sabz hawa se lachak lachak jae