har be-KHata hai aaj KHata-kar dekhna

har be-ḳhatā hai aaj ḳhatā-kār dekhnā

sachchā.iyoñ pe jhuuT kī yalġhār dekhnā

taqdīr ban na jaa.e shab-e-tār dekhnā

bujhne ko hai charāġh sar-e-dār dekhnā

maqtūl kī jabīñ pe hai qātil likhā huā

kyā faisla ho kal sar-e-darbār dekhnā

hogā bahut shadīd tamāzat kā intiqām

saa.e se mil ke ro.egī dīvār dekhnā

in pattharoñ ke saa.e meñ ruknā fuzūl hai

be-barg-o-be-samar haiñ ye kohsār dekhnā

is shahr-e-ārzū ko nazar kis kī khā ga.ī

maqtal bane haiñ kūcha-o-bāzār dekhnā

kuchh din agar ye mausam-e-vahshat-asar rahā

har aadmī ko be-dar-o-dīvār dekhnā

detā huuñ kaise jaan sar-e-jāda-e-vafā

mujh ko na dekhnā mirā pindār dekhnā

ḳhūn-e-jigar se likhtā huuñ 'sāġhar' maiñ harf-e-haq

vaqt aa.e to qalam ko bhī talvār dekhnā

har be-KHata hai aaj KHata-kar dekhna

sachchaiyon pe jhuT ki yalghaar dekhna

taqdir ban na jae shab-e-tar dekhna

bujhne ko hai charagh sar-e-dar dekhna

maqtul ki jabin pe hai qatil likha hua

kya faisla ho kal sar-e-darbar dekhna

hoga bahut shadid tamazat ka intiqam

sae se mil ke roegi diwar dekhna

in pattharon ke sae mein rukna fuzul hai

be-barg-o-be-samar hain ye kohsar dekhna

is shahr-e-arzu ko nazar kis ki kha gai

maqtal bane hain kucha-o-bazar dekhna

kuchh din agar ye mausam-e-wahshat-asar raha

har aadmi ko be-dar-o-diwar dekhna

deta hun kaise jaan sar-e-jada-e-wafa

mujh ko na dekhna mera pindar dekhna

KHun-e-jigar se likhta hun 'saghar' main harf-e-haq

waqt aae to qalam ko bhi talwar dekhna