har dam dua-e-ab-o-hawa mangte rahe

har dam duā-e-āb-o-havā māñgte rahe

nañge daraḳht sabz qabā māñgte rahe

yāroñ kā e'tiqād bhī andhā thā is qadar

gūñgī rivāyatoñ se sadā māñgte rahe

kitnī ajiib baat thī jab sard raat se

ham dopahar kī garm havā māñgte rahe

karte rahe jo din ke ujāloñ se ehtirāz

vo bhī añdherī shab meñ ziyā māñgte rahe

kuchh log aise bhī the jo lamhāt-e-karb se

āsūda sā.atoñ kā pata māñgte rahe

har dam dua-e-ab-o-hawa mangte rahe

nange daraKHt sabz qaba mangte rahe

yaron ka e'tiqad bhi andha tha is qadar

gungi riwayaton se sada mangte rahe

kitni ajib baat thi jab sard raat se

hum dopahar ki garm hawa mangte rahe

karte rahe jo din ke ujalon se ehtiraaz

wo bhi andheri shab mein ziya mangte rahe

kuchh log aise bhi the jo lamhat-e-karb se

aasuda saaton ka pata mangte rahe