har ek pal mujhe dukh dard be-shumar mile

har ek pal mujhe dukh dard be-shumār mile

ḳhudā kabhī to mere dil ko bhī qarār mile

zamāna dushman-e-jāñ ho gayā ye ġham hai magar

mirā nasīb ki ḳhanjar ba-dast-e-yār mile

kyā hogī is se bhī baḌh kar kisī kī mahrūmī

jise nasīb meñ tā-marg intizār mile

ai ālamīn ke rāziq batā kahāñ jā.ūñ

mire vatan meñ mujhe jab na rozgār mile

rahe vo zinda yā mar jaa.e farq kyā hai jise

ghuTan zamāne meñ aur qabr meñ fishār mile

maiñ muskurātā magar dī na ashk ne mohlat

ḳhushī jab ek milī saath ġham hazār mile

jo jhuuT bole hukūmat se daad le jaa.e

jo bole sach use tohfe meñ auj-e-dār mile

falak pe likkhūñ tirā naam mere naam ke saath

agar kabhī mujhe tāroñ par iḳhtiyār mile

maiñ jin se duur hī rahnā pasand kartā thā

vo zindagī kī masāfat meñ baar baar mile

ḳhushī se 'abr' har ik rabt munqata.a kar do

agar kahī koī duniyā meñ sogvār mile

har ek pal mujhe dukh dard be-shumar mile

KHuda kabhi to mere dil ko bhi qarar mile

zamana dushman-e-jaan ho gaya ye gham hai magar

mera nasib ki KHanjar ba-dast-e-yar mile

kya hogi is se bhi baDh kar kisi ki mahrumi

jise nasib mein ta-marg intizar mile

ai aalamin ke raaziq bata kahan jaun

mere watan mein mujhe jab na rozgar mile

rahe wo zinda ya mar jae farq kya hai jise

ghuTan zamane mein aur qabr mein fishaar mile

main muskuraata magar di na ashk ne mohlat

KHushi jab ek mili sath gham hazar mile

jo jhuT bole hukumat se dad le jae

jo bole sach use tohfe mein auj-e-dar mile

falak pe likkhun tera nam mere nam ke sath

agar kabhi mujhe taron par iKHtiyar mile

main jin se dur hi rahna pasand karta tha

wo zindagi ki masafat mein bar bar mile

KHushi se 'abr' har ek rabt munqata kar do

agar kahi koi duniya mein sogwar mile