har ek ka dard usi aashufta-sar mein tanha tha

har ik kā dard usī āshufta-sar meñ tanhā thā

vo ek shaḳhs jo saare nagar meñ tanhā thā

vo aadmī bhī jise jān-e-anjuman kahiye

chalā jab uTh ke to saare safar meñ tanhā thā

jo tiir aayā gale mil ke dil se lauT gayā

vo apne fan meñ maiñ apne hunar meñ tanhā thā

us ik diye se hue kis qadar diye raushan

vo ik diyā jo kabhī bām-o-dar meñ tanhā thā

sunā hai luT gayā kal raat rāste meñ kahīñ

jo ek rah-guzrī rahguzar meñ tanhā thā

uThā ye shor vahīñ se sadāoñ kā kyūñ-kar

vo aadmī to sunā apne ghar meñ tanhā thā

har ik meñ koī kamī thī har ik meñ thā koī aib

dhulā huā vahī bas āb-e-zar meñ tanhā thā

na pā sakā kabhī tā-umr lutf-e-tanhā.ī

umar jo saare jahāñ kī nazar meñ tanhā thā

har ek ka dard usi aashufta-sar mein tanha tha

wo ek shaKHs jo sare nagar mein tanha tha

wo aadmi bhi jise jaan-e-anjuman kahiye

chala jab uTh ke to sare safar mein tanha tha

jo tir aaya gale mil ke dil se lauT gaya

wo apne fan mein main apne hunar mein tanha tha

us ek diye se hue kis qadar diye raushan

wo ek diya jo kabhi baam-o-dar mein tanha tha

suna hai luT gaya kal raat raste mein kahin

jo ek rah-guzri rahguzar mein tanha tha

uTha ye shor wahin se sadaon ka kyun-kar

wo aadmi to suna apne ghar mein tanha tha

har ek mein koi kami thi har ek mein tha koi aib

dhula hua wahi bas aab-e-zar mein tanha tha

na pa saka kabhi ta-umr lutf-e-tanhai

umar jo sare jahan ki nazar mein tanha tha