har zarra hai jamal ki duniya liye hue

har zarra hai jamāl kī duniyā liye hue

insāñ agar ho dīda-e-bīnā liye hue

kaif-e-nigāh sehr-e-bayāñ masti-e-ḳhirām

ham aa.e un kī bazm se kyā kyā liye hue

naqsh-o-nigār-e-dahr kī rānā.iyāñ na pūchh

dar-parda haiñ kisī kā sarāpā liye hue

be-lāg maiñ guzar gayā har ḳhuub o zisht se

apnī nazar meñ zauq-e-tamāshā liye hue

rāh-e-hayāt meñ na milā koī ham-safar

tanhā chalā huuñ naam kisī kā liye hue

barbād-e-iltifāt kī taqdīr dekhnā

vo aa.e bhī to ranjish be-jā liye hue

hastī ke hādsoñ ke muqābil DaTā rahā

maiñ un kī ik nazar kā sahārā liye hue

'raihānī'-e-hazīñ hai ḳhizāñ meñ ġhazal-sarā

rangīnī-e-bahār kā saudā liye hue

har zarra hai jamal ki duniya liye hue

insan agar ho dida-e-bina liye hue

kaif-e-nigah sehr-e-bayan masti-e-KHiram

hum aae un ki bazm se kya kya liye hue

naqsh-o-nigar-e-dahr ki ranaiyan na puchh

dar-parda hain kisi ka sarapa liye hue

be-lag main guzar gaya har KHub o zisht se

apni nazar mein zauq-e-tamasha liye hue

rah-e-hayat mein na mila koi ham-safar

tanha chala hun nam kisi ka liye hue

barbaad-e-iltifat ki taqdir dekhna

wo aae bhi to ranjish be-ja liye hue

hasti ke hadson ke muqabil DaTa raha

main un ki ek nazar ka sahaara liye hue

'raihani'-e-hazin hai KHizan mein ghazal-sara

rangini-e-bahaar ka sauda liye hue