hasti ke har ek moD pe aaina bana hun

hastī ke har ik moḌ pe ā.īna banā huuñ

miT miT ke ubhartā huā naqsh-e-kaf-e-pā huuñ

vo dast-e-talab huuñ jo duā ko nahīñ uThtā

jo lab pe kisī ke nahīñ aa.ī vo duā huuñ

is daur meñ insān kā chehra nahīñ miltā

kab se maiñ naqāboñ kī taheñ khol rahā huuñ

bastī meñ basere kā irāda to nahīñ thā

dīvāna huuñ sahrā kā patā bhuul gayā huuñ

jaatī hī nahīñ dil se tirī yaad kī ḳhushbū

maiñ daur-e-ḳhizāñ meñ bhī mahaktā hī rahā huuñ

hasti ke har ek moD pe aaina bana hun

miT miT ke ubharta hua naqsh-e-kaf-e-pa hun

wo dast-e-talab hun jo dua ko nahin uThta

jo lab pe kisi ke nahin aai wo dua hun

is daur mein insan ka chehra nahin milta

kab se main naqabon ki tahen khol raha hun

basti mein basere ka irada to nahin tha

diwana hun sahra ka pata bhul gaya hun

jati hi nahin dil se teri yaad ki KHushbu

main daur-e-KHizan mein bhi mahakta hi raha hun