kaba-o-but-KHana walon se juda baiThe hain hum

ka.aba-o-but-ḳhāna vāloñ se judā baiThe haiñ ham

ik but-e-nā-āshnā se dil lagā baiThe haiñ ham

aap se apne ko dīvāna banā baiThe haiñ ham

kū-e-jānāñ chhoḌ ke jañgal meñ aa baiThe haiñ ham

kyuuñ mukaddar kar diyā nāzuk-mizājoñ kā mizāj

kūcha-e-jānāñ se chal jā ai sabā baiThe haiñ ham

ye duā ka.aba meñ karte haiñ ki us but se milā

tere darvāza par aa kar ai ḳhudā baiThe haiñ ham

vo to kahte haiñ ki uTh jaa.eñ mere kūcha se aap

haa.e kitnī ho ga.ī haiñ be-hayā baiThe haiñ ham

sargirānī hai abas ham ḳhāksāroñ se tumheñ

yā to miTne ko basān-e-naqsh-e-pā baiThe haiñ ham

apnā bātin ḳhuub hai zāhir se bhī ai jān-e-jāñ

aañkh ke laḌne se pahle jī laḌā baiThe haiñ ham

maiñ to kahtā huuñ ki bazm-e-ġhair hai yaañ se uTho

aur vo kahte haiñ mujh se tujh ko kyā baiThe haiñ ham

yā hameñ uThvā diyā yā uTh ga.e haiñ aap vo

gar kabhī majlis meñ bhī paas un ke jā baiThe haiñ ham

bazm-e-tasvīr apnī sohbat ho ga.ī hai in dinoñ

āshnā din meñ bhī ab nā-āshnā baiThe haiñ ham

paḌ gayā hai haath jab añgiyā pe us ḳhush-gāt kī

sūrat-e-shahbāz chiḌiyā ko dabā baiThe haiñ ham

guhar se uThne kī nahīñ bāhar nahīñ rakhne ke paaoñ

yaar ke sar kī qasam ai 'mehr' khā baiThe haiñ ham

kaba-o-but-KHana walon se juda baiThe hain hum

ek but-e-na-ashna se dil laga baiThe hain hum

aap se apne ko diwana bana baiThe hain hum

ku-e-jaanan chhoD ke jangal mein aa baiThe hain hum

kyun mukaddar kar diya nazuk-mizajon ka mizaj

kucha-e-jaanan se chal ja ai saba baiThe hain hum

ye dua kaba mein karte hain ki us but se mila

tere darwaza par aa kar ai KHuda baiThe hain hum

wo to kahte hain ki uTh jaen mere kucha se aap

hae kitni ho gai hain be-haya baiThe hain hum

sargirani hai abas hum KHaksaron se tumhein

ya to miTne ko basan-e-naqsh-e-pa baiThe hain hum

apna baatin KHub hai zahir se bhi ai jaan-e-jaan

aankh ke laDne se pahle ji laDa baiThe hain hum

main to kahta hun ki bazm-e-ghair hai yan se uTho

aur wo kahte hain mujh se tujh ko kya baiThe hain hum

ya hamein uThwa diya ya uTh gae hain aap wo

gar kabhi majlis mein bhi pas un ke ja baiThe hain hum

bazm-e-taswir apni sohbat ho gai hai in dinon

aashna din mein bhi ab na-ashna baiThe hain hum

paD gaya hai hath jab angiya pe us KHush-gat ki

surat-e-shahbaz chiDiya ko daba baiThe hain hum

guhar se uThne ki nahin bahar nahin rakhne ke paon

yar ke sar ki qasam ai 'mehr' kha baiThe hain hum