hijr-o-visal ke nae manzar bhi aaenge

hijr-o-visāl ke na.e manzar bhī ā.eñge

ābādiyoñ meñ aa.e to phir ghar bhī ā.eñge

āsāñ nahīñ hai utnī talāsh-e-jahān-e-nau

DhūñDoge gar jazīre samundar bhī ā.eñge

ai vaqt Dar hai tere ḳhudāoñ ko bas yahī

be-nañg-o-nām haiñ jo barābar bhī ā.eñge

duniyā isī kā naam hai har samt hī yahāñ

ban kar yaqīñ gumān ke mehvar bhī ā.eñge

ai chashm-e-iltifāt ye fōtpath ye saḌak

haiñ muntazir ki in pe qalandar bhī ā.eñge

maujoñ se laḌne dījiye kuchh der vaqt kī

jin meñ hai hausla vo ubhar kar bhī ā.eñge

haiñ naqsh-e-pā jahāñ jahāñ insāñ ke, dekhnā

qadmoñ meñ aadmī ke vo ambar bhī ā.eñge

māyūs yuuñ na bahr-e-adab ho, tū sabr kar

tujh ko ubuur karne shanāvar bhī ā.eñge

nākām sī rifāqateñ le kar kabhī yahāñ

dasht-e-vafā kī sair ko dilbar bhī ā.eñge

aajiz ho aql dekh ke sannā.ī jin kī vo

husn-e-jahāñ ke nit-na.e paikar bhī ā.eñge

tere liye jo vahm hai un ke liye yaqīñ

aksar yahāñ gumān ke mehvar bhī ā.eñge

badlā huā mizāj hai is baar vaqt kā

lahroñ kī zad meñ ab ke shanāvar bhī ā.eñge

bātoñ se phuul jhaḌte the lekin ḳhabar na thī

ik din laboñ se un ke hī nashtar bhī ā.eñge

Dhāoge tum jo mehvar-e-afkār ko to phir

ye jaan lo ki ġhaib se lashkar bhī ā.eñge

ham vo ḳhudā-tars haiñ faqīrī hai jin kī shaan

yūñhī rahe to dar pe sikandar bhī ā.eñge

kab 'ishq ruk sakā hai masā.ib se vaqt ke

dīvāne ḳhāk-o-ḳhūñ meñ nahā kar bhī ā.eñge

honī hai ḳhatm un kī bhī mohlat yaqīñ rakho

ye vaqt ke ḳhudā tah-e-ḳhanjar bhī ā.eñge

āfāq se pare hai mirā mehvar-e-ḳhayāl

hai hausla to phir na.e shahpar bhī ā.eñge

hijr-o-visal ke nae manzar bhi aaenge

aabaadiyon mein aae to phir ghar bhi aaenge

aasan nahin hai utni talash-e-jahan-e-nau

DhunDoge gar jazire samundar bhi aaenge

ai waqt Dar hai tere KHudaon ko bas yahi

be-nang-o-nam hain jo barabar bhi aaenge

duniya isi ka nam hai har samt hi yahan

ban kar yaqin guman ke mehwar bhi aaenge

ai chashm-e-iltifat ye footpath ye saDak

hain muntazir ki in pe qalandar bhi aaenge

maujon se laDne dijiye kuchh der waqt ki

jin mein hai hausla wo ubhar kar bhi aaenge

hain naqsh-e-pa jahan jahan insan ke, dekhna

qadmon mein aadmi ke wo ambar bhi aaenge

mayus yun na bahr-e-adab ho, tu sabr kar

tujh ko ubur karne shanawar bhi aaenge

nakaam si rifaqaten le kar kabhi yahan

dasht-e-wafa ki sair ko dilbar bhi aaenge

aajiz ho aql dekh ke sannai jin ki wo

husn-e-jahan ke nit-nae paikar bhi aaenge

tere liye jo wahm hai un ke liye yaqin

aksar yahan guman ke mehwar bhi aaenge

badla hua mizaj hai is bar waqt ka

lahron ki zad mein ab ke shanawar bhi aaenge

baaton se phul jhaDte the lekin KHabar na thi

ek din labon se un ke hi nashtar bhi aaenge

Dhaoge tum jo mehwar-e-afkar ko to phir

ye jaan lo ki ghaib se lashkar bhi aaenge

hum wo KHuda-tars hain faqiri hai jin ki shan

yunhi rahe to dar pe sikandar bhi aaenge

kab 'ishq ruk saka hai masaib se waqt ke

diwane KHak-o-KHun mein naha kar bhi aaenge

honi hai KHatm un ki bhi mohlat yaqin rakho

ye waqt ke KHuda tah-e-KHanjar bhi aaenge

aafaq se pare hai mera mehwar-e-KHayal

hai hausla to phir nae shahpar bhi aaenge