hisar-e-did mein roidagi malum hoti hai

hisār-e-dīd meñ roīdagī mālūm hotī hai

to kyuuñ andesha-e-tishna-labī mālūm hotī hai

tumhārī guftugū se aas kī ḳhushbū chhalaktī hai

jahāñ tum ho vahāñ pe zindagī mālūm hotī hai

sitāre misl jugnū zā.iche meñ raqs karte haiñ

zarā sī der meñ kuchh raushnī mālūm hotī hai

jahāñ par ek jogan mast ho kar gungunātī hai

usī sāhil pe ik girtī nadī mālūm hotī hai

udāsī zulf kholegī dinoñ kī yaad meñ gum hai

shu.ūr-e-gul ko fikr-e-tishnagī mālūm hotī hai

jahāñ pe phuul khiltā hai sañvartā hai bikhartā hai

usī shāḳh-e-mohabbat pe kalī mālūm hotī hai

satātī hai tumhārī yaad jab mujh ko shab-e-hijrāñ

mujhe ḳhud apnī hastī ajnabī mālūm hotī hai

tumhāre lams ko maiñ jab kabhī mahsūs kartā huuñ

bahut halkī sahī ik raushnī mālūm hotī hai

fanā honā añdherī raat kī taqdīr hai 'ālam'

mujhe ye bebasī bhī zindagī mālūm hotī hai

hisar-e-did mein roidagi malum hoti hai

to kyun andesha-e-tishna-labi malum hoti hai

tumhaari guftugu se aas ki KHushbu chhalakti hai

jahan tum ho wahan pe zindagi malum hoti hai

sitare misl jugnu zaiche mein raqs karte hain

zara si der mein kuchh raushni malum hoti hai

jahan par ek jogan mast ho kar gungunati hai

usi sahil pe ek girti nadi malum hoti hai

udasi zulf kholegi dinon ki yaad mein gum hai

shuur-e-gul ko fikr-e-tishnagi malum hoti hai

jahan pe phul khilta hai sanwarta hai bikharta hai

usi shaKH-e-mohabbat pe kali malum hoti hai

satati hai tumhaari yaad jab mujh ko shab-e-hijran

mujhe KHud apni hasti ajnabi malum hoti hai

tumhaare lams ko main jab kabhi mahsus karta hun

bahut halki sahi ek raushni malum hoti hai

fana hona andheri raat ki taqdir hai 'alam'

mujhe ye bebasi bhi zindagi malum hoti hai