hoti hai tere nam se wahshat kabhi kabhi

hotī hai tere naam se vahshat kabhī kabhī

barham huī hai yuuñ bhī tabī'at kabhī kabhī

ai dil kise nasīb ye taufīq-e-iztirāb

miltī hai zindagī meñ ye rāhat kabhī kabhī

tere karam se ai alam-e-husn-āfrīñ

dil ban gayā hai dost kī ḳhalvat kabhī kabhī

josh-e-junūñ meñ dard kī tuġhyāniyoñ ke saath

ashkoñ meñ Dhal ga.ī tirī sūrat kabhī kabhī

tere qarīb rah ke bhī dil mutma.in na thā

guzrī hai mujh pe ye bhī qayāmat kabhī kabhī

kuchh apnā hosh thā na tumhārā ḳhayāl thā

yuuñ bhī guzar ga.ī shab-e-furqat kabhī kabhī

ai dost ham ne tark-e-mohabbat ke bāvajūd

mahsūs kī hai terī zarūrat kabhī kabhī

hoti hai tere nam se wahshat kabhi kabhi

barham hui hai yun bhi tabi'at kabhi kabhi

ai dil kise nasib ye taufiq-e-iztirab

milti hai zindagi mein ye rahat kabhi kabhi

tere karam se ai alam-e-husn-afrin

dil ban gaya hai dost ki KHalwat kabhi kabhi

josh-e-junun mein dard ki tughyaniyon ke sath

ashkon mein Dhal gai teri surat kabhi kabhi

tere qarib rah ke bhi dil mutmain na tha

guzri hai mujh pe ye bhi qayamat kabhi kabhi

kuchh apna hosh tha na tumhaara KHayal tha

yun bhi guzar gai shab-e-furqat kabhi kabhi

ai dost hum ne tark-e-mohabbat ke bawajud

mahsus ki hai teri zarurat kabhi kabhi