husn-e-takmil-e-tamanna hai saba ho jaana

husn-e-takmīl-e-tamannā hai sabā ho jaanā

shahr-dar-shahr har ik dil kī ravā ho jaanā

paas aa aa ke har ik lamha bichhaḌnā terā

jaise ḳhushbū kā rag-e-gul se judā ho jaanā

is tarah TuuT ke barse haiñ garajte bādal

jaise jaagī huī āñkhoñ kī sadā ho jaanā

zindagī tū ne ka.ī rañg bhare haiñ paiham

zulf-e-shab-rañg kabhī rañg-e-hinā ho jaanā

kitne ban-bās liye phir bhī tire saath rahe

ham ne sochā hī nahīñ tujh se judā ho jaanā

jāñ-gusil vaqt kī tasvīr adhūrī rakh dī

ham ne chāhā nahīñ har rañg kā vā ho jaanā

khetiyāñ suukh ga.iiñ ḳhushk hue dil ke nagar

bāvar aayā hameñ paanī kā havā ho jaanā

bujh ga.e rāh-e-tamannā meñ hazāroñ jugnū

tum mire vāste naqsh-e-kaf-e-pā ho jaanā

ye bhī mumkin nahīñ ai dost to sab kī ḳhātir

chāñdnī ban ke kahīñ jalva-numā ho jaanā

husn-e-takmil-e-tamanna hai saba ho jaana

shahr-dar-shahr har ek dil ki rawa ho jaana

pas aa aa ke har ek lamha bichhaDna tera

jaise KHushbu ka rag-e-gul se juda ho jaana

is tarah TuT ke barse hain garajte baadal

jaise jagi hui aankhon ki sada ho jaana

zindagi tu ne kai rang bhare hain paiham

zulf-e-shab-rang kabhi rang-e-hina ho jaana

kitne ban-bas liye phir bhi tere sath rahe

hum ne socha hi nahin tujh se juda ho jaana

jaan-gusil waqt ki taswir adhuri rakh di

hum ne chaha nahin har rang ka wa ho jaana

khetiyan sukh gain KHushk hue dil ke nagar

bawar aaya hamein pani ka hawa ho jaana

bujh gae rah-e-tamanna mein hazaron jugnu

tum mere waste naqsh-e-kaf-e-pa ho jaana

ye bhi mumkin nahin ai dost to sab ki KHatir

chandni ban ke kahin jalwa-numa ho jaana