iman ki numaish hai sajde hain ki afsane

īmāñ kī numā.ish hai sajde haiñ ki afsāne

haiñ chāñd jabīnoñ par aur zehn meñ but-ḳhāne

kuchh aql ke matvāle kuchh ishq ke dīvāne

parvāz kahāñ tak hai kis kī ye ḳhudā jaane

kam-zarf kī niyyat kyā pighlā huā lohā hai

bhar bhar ke chhalakte haiñ aksar yahī paimāne

ab rang ke nasloñ ke but TuuT chuke saaqī

ab kyuuñ diye jaate haiñ pahchān ke paimāne

tamhīd-e-qayāmat hai ik raat kā hangāma

ehsās kī sham.eñ haiñ jazbāt ke parvāne

saaqī ke salīqe par husn-e-do-jahāñ sadqe

sayyāroñ kī gardish hai yā daur meñ paimāne

ye ek laḌī ke sab chhiTke hue motī haiñ

ka.abe hī kī shāḳheñ haiñ bikhre hue but-ḳhāne

kuchh tishna-lab ai saaqī ḳhuddār bhī hote haiñ

uḌ jā.egī mai rakkhe rah jā.eñge paimāne

ik kāfir-e-mutlaq hai zulmat kī javānī bhī

be-rahm añdherā hai sham.eñ haiñ na parvāne

tārīḳh varaq apnā ulTegī 'sirāj' ik din

āfāq meñ phir zinda hoñge mire afsāne

iman ki numaish hai sajde hain ki afsane

hain chand jabinon par aur zehn mein but-KHane

kuchh aql ke matwale kuchh ishq ke diwane

parwaz kahan tak hai kis ki ye KHuda jaane

kam-zarf ki niyyat kya pighla hua loha hai

bhar bhar ke chhalakte hain aksar yahi paimane

ab rang ke naslon ke but TuT chuke saqi

ab kyun diye jate hain pahchan ke paimane

tamhid-e-qayamat hai ek raat ka hangama

ehsas ki shamen hain jazbaat ke parwane

saqi ke saliqe par husn-e-do-jahan sadqe

sayyaron ki gardish hai ya daur mein paimane

ye ek laDi ke sab chhiTke hue moti hain

kabe hi ki shaKHen hain bikhre hue but-KHane

kuchh tishna-lab ai saqi KHuddar bhi hote hain

uD jaegi mai rakkhe rah jaenge paimane

ek kafir-e-mutlaq hai zulmat ki jawani bhi

be-rahm andhera hai shamen hain na parwane

tariKH waraq apna ulTegi 'siraj' ek din

aafaq mein phir zinda honge mere afsane