ek dariche ki tamanna mujhe dubhar hui hai

ik darīche kī tamannā mujhe dūbhar huī hai

vo ghuTan hī mirī sāñsoñ pe muqarrar huī hai

aaj rakkhe haiñ qadam us ne mirī chaukhaT par

aaj dahlīz mirī chhat ke barābar huī hai

niiñd ne niiñd se chauñkā ke uThāyā mujh ko

ḳhvāb meñ ḳhvāb kī ta.abīr ujāgar huī hai

us ne rātoñ ke taqaddus ko kiyā hai majrūh

ek muTThī bhī jise dhuup mayassar huī hai

jab se sīkhā hai hunar shīshagarī kā maiñ ne

bas usī din se ye duniyā hai ki patthar huī hai

ab zamīnoñ ko bichhā.e ki falak ko oḌhe

muflisī to bharī barsāt meñ be-ghar huī hai

ek muddat se jo sahrā-e-masarrat thī 'salīm'

ġham ke chhūte hī vahī chashm samundar huī hai

ek dariche ki tamanna mujhe dubhar hui hai

wo ghuTan hi meri sanson pe muqarrar hui hai

aaj rakkhe hain qadam us ne meri chaukhaT par

aaj dahliz meri chhat ke barabar hui hai

nind ne nind se chaunka ke uThaya mujh ko

KHwab mein KHwab ki tabir ujagar hui hai

us ne raaton ke taqaddus ko kiya hai majruh

ek muTThi bhi jise dhup mayassar hui hai

jab se sikha hai hunar shishagari ka main ne

bas usi din se ye duniya hai ki patthar hui hai

ab zaminon ko bichhae ki falak ko oDhe

muflisi to bhari barsat mein be-ghar hui hai

ek muddat se jo sahra-e-masarrat thi 'salim'

gham ke chhute hi wahi chashm samundar hui hai