ek KHala sa hai jidhar dekho idhar kuchh bhi nahin

ik ḳhalā sā hai jidhar dekho idhar kuchh bhī nahīñ

āsmāñ kaun-o-makāñ dīvār-o-dar kuchh bhī nahīñ

baḌhtā jaatā hai añdherā jaise jaadū ho koī

koī paḌh liije duā lekin asar kuchh bhī nahīñ

jism par hai kaun se ifrīt kā saaya savār

bhāgtā hai sar se dhaḌ jaise ki sar kuchh bhī nahīñ

har nayā rasta nikaltā hai jo manzil ke liye

ham se kahtā hai purānī rahguzar kuchh bhī nahīñ

ehtimām-e-zindagī se haiñ ye sab naqsh o nigār

varna ghar kuchh bhī nahīñ dīvār-o-dar kuchh bhī nahīñ

ghar meñ apne saath jab rakkhoge 'āmir' dekhnā

jis ko tum kahte ho ab rashk-e-qamar kuchh bhī nahīñ

ek KHala sa hai jidhar dekho idhar kuchh bhi nahin

aasman kaun-o-makan diwar-o-dar kuchh bhi nahin

baDhta jata hai andhera jaise jadu ho koi

koi paDh lije dua lekin asar kuchh bhi nahin

jism par hai kaun se ifrit ka saya sawar

bhagta hai sar se dhaD jaise ki sar kuchh bhi nahin

har naya rasta nikalta hai jo manzil ke liye

hum se kahta hai purani rahguzar kuchh bhi nahin

ehtimam-e-zindagi se hain ye sab naqsh o nigar

warna ghar kuchh bhi nahin diwar-o-dar kuchh bhi nahin

ghar mein apne sath jab rakkhoge 'amir' dekhna

jis ko tum kahte ho ab rashk-e-qamar kuchh bhi nahin