ek sahifa naya utra hai suna hai logo

ik sahīfa nayā utrā hai sunā hai logo

mārnā dost kā bhī jis meñ ravā hai logo

ham ne jo kuchh na kyā us kī sazā bhī paa.ī

aur vo jo bhī kare sab hī ravā hai logo

zulm kī had hai jahāñ ḳhatm vahāñ par vo hai

DhūñD lo us ko yahī us kā patā hai logo

dil meñ ik shola-e-ummīd thā so sard huā

chāñd māthe kā mire kab kā bujhā hai logo

jis ko tum kahte ho ḳhush-baḳht sadā hai mazlūm

jiinā har daur meñ aurat kā ḳhatā hai logo

dekhiye zaḳhm kā kyā haal huā hai 'raziya'

aaj to dard mirā had se sivā hai logo

ek sahifa naya utra hai suna hai logo

marna dost ka bhi jis mein rawa hai logo

hum ne jo kuchh na kya us ki saza bhi pai

aur wo jo bhi kare sab hi rawa hai logo

zulm ki had hai jahan KHatm wahan par wo hai

DhunD lo us ko yahi us ka pata hai logo

dil mein ek shola-e-ummid tha so sard hua

chand mathe ka mere kab ka bujha hai logo

jis ko tum kahte ho KHush-baKHt sada hai mazlum

jina har daur mein aurat ka KHata hai logo

dekhiye zaKHm ka kya haal hua hai 'raziya'

aaj to dard mera had se siwa hai logo