اس عالم پر درد میں دکھ سب کا خدا ہے

اس عالم پر درد میں دکھ سب کا خدا ہے

دل بارگہ دکھ میں عقیدت سے کھڑا ہے

اے شام نشیں رات کی تحویل میں آ جا

اک خواب تیری راہ گزر دیکھ رہا ہے

قم بازن العشق سے دل زندہ کرے گا

ی مجھ سے محبت کے مسیحا نے کہا ہے

دانستہ کبھی چھو کے وہ لذت نہیں پائی

جو لطف کسی لمس کے دھوکے سے ملا ہے

ساون کے پجاری سے کہو کیا ہی کرے گا

اس بار تو آنکھوں میں غضب کال پڑا ہے

وہ کوئی قیامت نہیں بس آفت جاں تھا

بے کار تیرے شہر میں اک حشر بپا ہے

سب ہار دئیے جانے کا غم چھوڑ یدھشٹھر

مادھو کی طرف سے یہ شبھ آرمبھ ہوا ہے