is guftugu se yun to koi muddaa nahin

is guftugū se yuuñ to koī mudda'ā nahīñ

dil ke sivā harīf koī dūsrā nahīñ

āñkheñ taras ga.iiñ tumheñ dekhe hue magar

ghar qābil-e-ziyāfat-e-mehmāñ rahā nahīñ

nāqūs koī bahr kī tah meñ hai na.ara-zan

sāhil kī ye sadā to koī nāḳhudā nahīñ

maanā ki zindagī meñ hai zid kā bhī ek maqām

tum aadmī ho baat to sun lo ḳhudā nahīñ

lutf-e-suḳhan yahī thā ki ḳhud tum bhī kuchh kaho

ye vahm hai ki ab koī gosh-e-vafā nahīñ

merī vafā barā.e vafā ittifāq thī

mere sivā kisī pe ye afsūñ chalā nahīñ

us kī nazar taġhayyur-e-hālāt par ga.ī

koī mizāj-dān-e-mohabbat milā nahīñ

is guftugu se yun to koi mudda'a nahin

dil ke siwa harif koi dusra nahin

aankhen taras gain tumhein dekhe hue magar

ghar qabil-e-ziyafat-e-mehman raha nahin

naqus koi bahr ki tah mein hai nara-zan

sahil ki ye sada to koi naKHuda nahin

mana ki zindagi mein hai zid ka bhi ek maqam

tum aadmi ho baat to sun lo KHuda nahin

lutf-e-suKHan yahi tha ki KHud tum bhi kuchh kaho

ye wahm hai ki ab koi gosh-e-wafa nahin

meri wafa barae wafa ittifaq thi

mere siwa kisi pe ye afsun chala nahin

us ki nazar taghayyur-e-haalat par gai

koi mizaj-dan-e-mohabbat mila nahin